( Istoria badak ne’e mai husi
esperiensia real no hakerek iha istilu fiksaun )
 |
| Reflesaun |
Sokolate mos seidauk bele halo hau
haksolok nune’e.
Maria horut nia sha, maibe nia matan
hateke klean ba pintura fitun iha kalan nian nakukun ne’ebe tara iha restorante
nian didin. Maria hakfodak husi Elis nia husu “Maria, konta lai interview bolsu estudu Japaun O tuir ona ne’e? Hau
penasaran los, ohin iha edifisiu hau la tahan ona atu husu O, mas tauk sira
rona”. Rona ne’e Nana ne’ebe tur mos ho Maria no Elis hatan “aiiiihhh sira hatene agora ne’e Maria mate
kedan, ita nain tolu deit maka tengki hatene!”. Maria muda nian tur ho diak
no komesa koalia ba nian kolega diak rua ne’e “buat hotu lao ho diak no hau hatan hotu perguntas sira husi panelista
ho diak, hau sinti. Maibe, iha panelista ida maka doko maibe hametin hau, tamba
nian lia-fuan hirak ne’ebe hasai mai hau halo hau sei fiar a’an hala’i makas ba
oin”. Ho seriu Elis husu “panelista
ne’e naran saida? Nia maka ida ne’ebe ne’e?” no ho ansi Nana husu “lia-fuan saida maka nia hatete sai ba O?”.
Maria nian matan hateke ba nian kolega diak rua ne’e no hamnasa antes hatan
perguntas sira ne’e, Maria hatan “nia
dehan “I’am impressed with you”. Mana
Marlina ne’ebe servisu iha embaixada Japaun asuntu bolsu estudu, maka dehan
lia-fuan hirak ne’e mai hau saaa..hahahahaaa”. Rona ida ne’e Nana hakfodak
to’o fakar sai sha ne’ebe iha ibun laran no Elis hatun tia sikra kafe ne’ebe
hit ona husi nia liman atu ba nia ibun. Depois hamos ibun ho tissue Nana dehan “Mana Marlina ida O dehan siak ten ituan ne’e kah? Hahahha Jesus kala
tur iha nian baboton”, Maria seidauk hatan ba Nana, Elis aumenta “hahhahaaa hare baa! Ema ida O dehan tauk
atu hateke nian oin ne’e maka agora fo los masi-midar ba O ne’e”. Maria ho
oin kontenti hatan “dalabarak iha
telefone Mana Marlina nian lian rona hanesan siak ituan duni no bainhira hau
hala’o teste iha lian ingles ba bolsu estudu ne’e nia oin siak los, halo hau
tauk atu hare nia kleur no los duni hau nunka espera Mana Marlina bele ho nian
lia-fuan hirak ne’e kria kedan moris foun ba hau depois sai husi sala interview
bolsu estudu ne’e, hmmm.. lia-fuan lulik”. Maria kontinua koalia mas agora
ho ispritu makas ituan, “Mana Marlina,
hateten lia-fuan hirak ne’e ho nian fuan duni mai hau, hau hare no sinti nune’e
duni. Hau laran dodok los, fuan no kakorok sinti metin no matan sinti manas
tamba matan be’en atu sai, maibe hau susesu duni atu konsentrasaun nafatin ba
interview, afinal iha ema ida nian matan hau ne’e super person ida!”. Elis ho hamnasa ki’ik midar dehan “Maromak nian lia-fuan hatutan liu husi
Mana Marlina”, Nana mos hatan tutan “amin..!”. Udan tun iha lokraik ne’e,
lori matak malirin ba ema hotu no Maria ho nian kolega sira kontinua sira nia
dada-lia ho ksolok.
***
Tempu ki’ik Maria fokus halo ksolok
a’an ho hakerek poezia no diary, kuda
ai-funan kor oin-oin iha nian uma. Aventura ki’ik ba mota, foho, natar no
ai-laran ki’ik sira besik sira nian uma. Filme kartun Doraemon maka fo nia mehi atu han dosi dorayaki iha Japaun no filme
sira husi Bollywood maka halo nia iha
mehi atu kaer didin husi konstrusaun Taj Mahal ne’ebe furak no riku tebes. Maibe
Maria ki’ik la-hetan forsa inpirasaun husi nian inan-aman tamba sira preoukupa
liu ba sira nia kareira. Enviromentu universidade maka hanorin Maria importante
husi forsa inspirasaun no espritu, Maria haksolok ho ida ne’e maibe haksolok ne
la kleur deit. Durante tinan tolu ho balu servisu depois remata universidade,
durante ne’e Maria nia karakter mate. Lian barak iha servisu fatin maka hakilar
hanesan Maromak Gregu Zeus nian rai lakan ne’ebe rezada maka’as Maria nia neon
espritu no inspirasaun ne’ebe iha ona halo menus, prior liu maka Maria fiar
katak nia a’an hanesan sira hakilar ba’a ne’e. Sira dehan, “Maria.. ne’e sala!”, “saida maka O halo ne’e la los!, halo fali maibe
la bele sala tan!”, “O sarjana ida maibe halo ida ne’e mos la bele!” “Maria,
dehan O estuda diplomasi maibe nusa maka O nian diplomasi la hatudu iha karta
ne’e!” no sira fo dutrina ba Maria no kolega iha servisu fatin katak agora
servisu no rai osan lai tamba agora buka servisu susar eskola depois deit. Sira
sempre hamnasa hatun ba saida maka Maria halo ho ninian projeitu hakerek no
fotografia iha blog.
***
Iha dader importante ida, Maria dada
i’is naruk ho habrani nia liman hodi dere odamatan iha nian oin ne’e. Depois
dere, lian husi odamatan sorin ne’e dehan “tama
mai..”. Maria hakat tama ba sala luan ho tinta mutin nabilan, iha ne’eba
iha meja, kadeira, sofa, armari, jelera ho folin ne’ebe a’as, tara mos pintura
ai-funan no pintura uma lulik husi tais. Sinti AC nian hu’u ne’ebe borus ba nia
ruin, Maria hase’e mane ida tur hela iha komputador oin “bomdia diretur, lisensa hau lori karta rejiknasaun husi hau. Favor
atende lai”. Mosu espresaun hakfodak maibe finji kalma husi diretur, karik diretur ne’e la fiar saida maka nia foin
dadaun rona husi ema ne’ebe sempre nonok no simu saida maka julga ba nia. Diretur
hatan “diak, nusa maka atu rejikna a’an
ona ne’e Maria? Hetan servisu foun ruma kah?” ho seriu no lian firme Maria
hatan “lae, tamba Mana Marlina nian
lia-fuan lulik maka loke hau nian hanoin katak hau diak liu dala barak ida imi
hanoin durante ne’e no julga falsu sira imi fo mai ona hau! imi ho imi nian
mentalidade sira ne’e la serteja atu hetan hau! Aban hau komesa la tama ona servisu,
Obrigada!”, Maria hamrik lao fila kotuk ba nian eis direktur ne’e no nia
rona lian hakilar tuir “Marlina ne’e se?
lulik nain perigu ida kah? hahahaha” fila oin no isi sorin Maria ho firme
hatan “rona didiak!, Mana Marlina nian
lia-fuan maka lulik!”. Odamatan taka a’an iha Maria nian kotuk, ba dahuluk
depois tinan tolu ho balu Maria sinti ho lolos katak nia aseita saida maka nia
desidi ona no haksolok ba ida ne’e.
Depois husi edifisiu ne’ebe Maria
husik ona, nia ho motor produtu husi Japaun para iha area fatin para vehiklu
iha area Cristo Rei, Dili. Hamnasa ksolok, Maria hakat luan iskada ba iskada
atu ba iha foho tutun statu Cristo Rei. Husi tasi, anin hu’u fresku halo Maria
nian fu’uk semo badak, loron matan sunu ho manas mamar ne’e duni maske kosar
sai maibe Maria sei la desidratasaun ou dehidrasi. Ai-tahan matak sira hanesan
tebe hasoru hela Maria tamba anin nian hu’u, iha tilun Maria tau hela headseat no rona knanuk furak husi Dee
Lestari ho tittlu Malaikat Juga Tau,
to’o iha parte liriku “Malaikat juga tau aku kan jadi juaranya”
Maria kanta hakilar deit ho hanoin katak atu hatete sai ba sira ne’ebe hatun
ona nia katak nia maka sei manan! To’o iha tutun, Maria hateke ba statu Cristo
Rei la iha lian ruma, so komunika ho hamnasa ki’ik. Lapizera iha liman, kadernu
suratahan mutin tau iha baki leten fila kotuk ba statu Cristo Rei no hamrik
hateke ba tasi azul luan, Maria nian fuan hakerek liu husi nian liman tun ba
lapizera kontinua ba suaratahan mutin ne’e:
POEZIA
Lia-fuan Lulik
Hakotu oin hakruk, laos atu foti hodi
loko a’an.
Bisu-bisu no mos hakilar, hametin
neon no mehi namalele sira ne’e.
La iha fatin ba kalohan metan atu
ataka, la fo’o fatin ba rai-lakan atu tarutu hatauk.
Metin tuba rai, tebe hasuar rai,
haroman to’o loro-matan mos subar moe.
Hakerek poezia remata, Maria hamnasa
ksolok tebes hamrik to’o loro-matan tu’un nian kor laranja ou orange lakan siak
hafalun tasi ninin do’ok iha nian oin. Lao tu’un tu-tuir iskada Maria rona
knanuk husi knanuk nain Miley Cyrus ho titlu When I look at you, no bainhira to’o iha parte “when my world is falling apart,
when there’s no light to break up the dark, that’s when I look at you”
momentu ne’eba Maria hamosu lian iha nian fuan “Mana Marlina maka masi-midar husi lalehan mai hau, laos lulik nain
maibe nian iha lia-fuan lulik hodi kria poezia mai hau moris. Obrigada barak! Hau
nian moris loke ona pajina foun tamba lia-fuan lulik ne’e, komesa kedan ho
hamnasa brani. Ai-kasi funan mos sei hamnasa ho hau tamba ida ne’e”.
"Eskrava foun ka atan foun agora maka sira ne’ebe tauk atu sai husi servisu no lakon osan para atu hateten deit Ya Pak,"- Prezidente Republika Demokratika de Timor-Leste, Sua exselensia Taur Matan Ruak.
 |
| Loro-Matan tu'un nian kor hare husi Cristo Rei, Dili |
Tidak ada komentar:
Posting Komentar