AREA DIOCESA DISTRITU BAUCAU: AREA REKREIU LABARIK BAUCAU

Kareta lori ami para iha Aula Diocesa Baucau nia oin, iha loron ne’eba ( 15 Outubru 2014 ), ami iha servisu halo konsolidasaun workshop ba 150 lideransa lokal iha Distritu Baucau. Iha momentu ne’eba Hau hetan momentum spesial tebes ho nune inspira Hau atu hakerek artigu ne’e.

Statu iha be kanu iha area Diocesa Baucau, Kota Lama.

Area Diocesa Baucau laos fatin ba turista sira maibe ema Baucau sira hatene maibe laos konesidu hanesan kulu gisa, fatuk ruin tasi, Pousada Baucau, Picina de Baucau, tasi Watabou maibe nia sai ona fatin fo mahon ba Labarik Baucau ne’ebe iha problema no mos ba labarik ne’ebe hakarak halimar. 

Parte oin statu iha be kanu

Wainhira serimonia lao dadaun iha oras dader Hau nia matan hateke ba Igreja iha area Diocesa Baucau iha Kota Lama ne’ebe besik hela iha Aula ida ami uza ba ami nia serimonia servisu nian. Ain rua lori Hau hakat ba Igreja ne’e, tamba Igreja nia odamatan taka antau Hau desidi atu hasai foto aifunan ne’ebe moris haleu iha Igreja, hasai hela foto aifunan sapatu ou Indonezia lian karik bunga sepatu iha parte ninin oin purtaun enkuantu hateke ba tasi Baucau teki-teki lian hamnasa labarik mane halo Hau hateke ba kotuk no interese tebes mai Hau, hare labarik mane ida hatais farda eskola kompletu iha oras eskola nian no iha nia liman iha manu lin ida no labarik mane seluk la hatais farda eskola no kaer hela kilat halimar nian iha liman sorin. Tamba interese ho sira nain rua nia hamnasa no hatais sira ne’e Hau mos lao hakat ba sira rua hodi komesa dada lia, Alin bonito rua ne’e halo saida iha ne’e? hateten Hau, sira nain rua hamnasa no ida la tau farda eskola ne’e hatan ho logat Baucau nian “ ami halimar abin” no kontinua hamnasa hatudu nia nehan kuak rua iha oin. Hau kontinua husu “imi gostahalimar iha Igreja oin ne’e kah?”  agora ida hatais farda ne’e maka hatan “ ami gosta” ida la hatais farda ne’e hatan mos “ loron-loron ami mai halimar iha Igreja ne’e”. Hau husu ho liman hatudu ba labarik ne’ebe hatais farda eskola “nusa maka la tama eskola?” diretamente hatan husi labarik ne’ebe la hatais farda eskola, nia dehan “nia la tama eskola tamba ohin iha prova le, nia bot ona mos le seidauk hatene tauk mestre baku” no labarik ne’e hamnasa makas no labarik ida hatais farda eskola ne’e hamnasa moe. Tamba hanoin labarik ne’e Hau dehan “la iha buat ida, estuda makas tan ne’e para bele le. Manu lin ne’e se maka kaer?” “ Hau maka kaer” hatan labarik hatais farda ne’e no sambil kose manu lin nia ulun.

Labarik hatais farda eskola kompletu kaer manu lin no nia kolega ne'ebe kaer kilat halimar

Problema labarik ida hatais farda eskola ne’e karik sai hanesan problema labarik Oan Timor lubuk. Violensia fiziku husi mestre no mestra sira iha eskola laos fo deit moras ba isin husi labarik ou alunus sira maibe moras mos ba sira nia mental aumenta tan husi hamnasa, goza hatun husi kolega sira hamosu mental la brani, la fiar a’an, tauk no seluk tan ba privadu labarik sira. Sintimentu ne’ebe mosu husi labarik ne’e maka: hamrik mesak oan la iha apoiu husi se deit.

Hau nia ain hoban iha be fresku malirin iha kanu area Diocesa Baucau

Depois han meudia temperatura komesa sae makas liu tan, hotu-hotu iha Aula laran komesa kaer suratahan kehe sira nia a’an ho ida ne’e Hau desidi sai husi aula no ba tur iha be kanu iha besik Aula Diocesa ne’ebe Hau hare ona iha dader atu hoban ain. Wainhira Hau to’o iha be kanu ne’e Hau hasoru labarik mane nain tolu halimar hela game iha telephone. Hau hamosu pergunta ba sira “Imi sai ona eskola kah?”  sira hatan “Ami sai ona Abin” Hau koalia tan “ nusa mak la fila liu ba uma? La hamlaha kah?” labarik ida seluk hatan “ ami sei hakarak halimar lai iha ne’e” ida seluk hatan tan “ami nia uma besik hela iha ne’e” Hau mos husu tan pergunta ba sira “ imi mai halimar iha ne’e loron-loron kah?” sira para tia halimar game ne’e pois sira hotu hateke mai Hau no ida seluk hatan “Sim, kalan mos ami mai iha ne’e hodi tiru boek. Boek iha meudia subar iha fatuk laran kalan maka sira sai barak” Hau husu hodi taka ami nia konversa “ fatin ne’e halo imi kontenti kah?” balu doko ulun ho hamnasa kontenti, sinal sira aseita fatin ne’e halo sira kontenti no ida seluk hatan “huh..uuhhh”.

Hau mos sinti kontenti ho fresku tebes wainhira hoban ain iha be kanu ho be malirin no anin fresku hu’u hodi hamaran Hau nia kosar. Hakfodak ituan tamba labarik mane ida tur hodi hare hela Hau tebe halimar be ne’ebe sulin iha kanu ne’e. Hau komesa kedan dadalia ho nia “ alin naran saida?” nia hatan “ Aldo”. Hau koko hasai nia foto ho Hau nia kamera maibe nia fila kotuk hodi subar moe nia oin. Hau kontinua husu “ Aldo ohin ba eskola kah lae?” nia hatan “ Hau fila tiaona husi eskola”, Hau husu fali “nusa la fila ba uma?” no Aldo hatan “ lae, Hau sei halimar pois haris iha ne’e ho Hau nia kolega sira, Hau nia uma iha karaik oan ne’e”.

 

Aldo fila kotuk bainhira Hau koko hasai nia fotgrafia

Aldo no kolega sira

Aldo prepara burasa no kesak hodi tiru boek iha be kanu

Aldo luku iha be kanu

Ho kolega sira Aldo sempre haris iha be kanu area Diocesa Baucau

Husi ami nia hasoru malu no konversa simples ne’e Hau estuda buat rua, ida maka sempre koko kontenti iha situasaun tristi laran no sempre buka atu halo saida maka halo ita nia a’an kontenti.

Dili, Outubru 2014

Mariani VK.