ADEZAUN TIMOR-LESTE BA ASEAN; PERPEKTIVA SIGURANSA

Artigu ne’e hakerek desde tinan 2013 bainhira Hau sei servisu iha ONG Fundasaun Mahein/FM hanesan Peskizador. Artigu ne’e hetan sugestaun barak husi Belun sira iha ONG FM liu-liu Maun Nelson Belo ( Direktor Ezekutivu ), no mos data barak mak hetan husi artigu-artigu antes husi ONG FM no ikus mai kombina ho data seluk no analiza personal.

Introdusaun

Polemik polítika Timor-Leste ne’ebe mosu iha fulan Novembru 2013 entre Primeiru Ministru ( PM ) Xanana Gusmao ho Mak Moruk, ne’ebe nia rezultadu mak PM Xanana Gusmao promete atu rejikna a’an iha tinan 2015. Karik ida ne’e sei sai problema ba polítika interna Timor-Leste maibe problema mos ba polítika eksterna Timor-Leste, tamba 2015 sai hanesan tinan ikus ba Timor-Leste atu hetan legalizasaun hanesan membru ASEAN. Problema mak hanesan ita hotu hatene iha tempu PM Xanana maka Timor-Leste hatudu nia seriu no servisu makas ba aplikasaun Timor-Leste iha adeazaun ba ASEAN ( ne’ebe foka sai iha media nasional no internasional ), karik iha tinan 2015 PM Xanana la lidera tan Timor-Leste maka sei fo impaktu siknifikan ba polítika prosesu adeazaun Timor-Leste ba ASEAN.

ASEAN nudar organizasaun nasaun sira iha Azia Sudeste ne’ebe funda husi nasaun lima, mak hanesan Indonezia, Malazia, Filipina, Singapura no Thailandia iha 28 de Agustu 1967. Membru nasaun ASEAN haluan tan ba sanulu, tamba hetan adeazaun husi Brunei Darussalam iha tinan 1984, Vietnam iha tinan 1995, Laos no Mianmar iha tinan 1997 no Kambodia iha tinan 1999.

Tinan hirak tuir mai iha notisia ne’ebe popular tebes konaba’a ASEAN Community ou Komunidade ASEAN iha 2015, mak hanesan tranformasaun ba realidade husi objektivu ASEAN Vision 2020 ou Vizaun ASEAN 2020. The ASEAN Vision 2020 konseptu ida ne’ebe atu realiza Rejional ASEAN hanesan mata dalan ou diresaun husi Nasaun Azia Sudeste sira, vizaun ne’ebe luan, hela iha paz nia laran, stabilidade no prosperiadade nia laran, ligadu hamutuk iha enviromentu demokrasia no harmonia, dezenvolvementu ne’ebe dinamiku no sempre besik ba intregasaun ekonomia no mos komunidade ne’ebe interese ba malu, konsiensia ba relasaun historia, iha konsiensia ba riku soin kultura ida deit no ligadu iha identidade rejional ne’ebe hanesan.

Deklarasaun husi ASEAN Concord II iha Bali, Indonezia ( Declaration of ASEAN Concord II ) iha tinan 2003, Ulun nain ou lider Governu nasaun ASEAN momentu ne’eba atu establese Komunidade ASEAN antes 2020, Komunidade ASEAN iha pilares tolu mak hanesan ASEAN political-security community ou komunidade polítika-siguransa ASEAN, ASEAN economic community ou komunidade ekonomia ASEAN no ASEAN socio-cultural community ou komunidade sosiu-kultural ASEAN. Depois iha tinan 2007 lider ASEAN iha 12th ASEAN Summit iha Filipina desidi atu aselera establese ASEAN Community antes 2015 ho razaun katak bele hasa’e tan sentralasaun no hanesan papel atu haforsa formasaun rejional ne’ebe dezenvolve. Tuir mai iha Novembru 2007 iha 13th ASEAN Summit iha Singapura Lider nasaun ASEAN sira asina ASEAN Charter konaba’a komitmentu iha intesivu programa Community-building ou hari’i-komunidade husi hasa’e koperasaun rejional no intregasaun no fo mos servisu ba ministru no funsionariu nasaun ASEAN sira atu halo draft APSC Blueprint ne’ebe sei adapta iha 14th ASEAN Summit. APSC Blueprint ne’e hanesan mata dalan ou
mapa no tempu atu establese Komunidade ASEAN iha 2015 no sei iha fleksidade mos atu kontinua ba programa siguransa ASEAN nian depois 2015.

Pilares tolu ne’e maka pontus objektivu Komunidade ASEAN 2015 hodi realiza Vizaun ASEAN iha 2020. Artigu ida ne’e sei foka liu konaba’a pilar Komunidade polílitika-siguransa ASEAN lina ho siguransa Timor-Leste. ASEAN political-security community ou komunidade polítika-siguransa ASEAN/ APSC nudar pilar husi ASEAN Community ne’ebe foka ba iha polítika no seguransa iha rejiaun Azia Sudeste. APSC hanesan entidade ne’ebe mantem ba stabilidade iha rejiaun Azia Sudeste ho la establese paktu siguransa ou polítika estranjeirus ne’ebe komum maibe sei mantein siguransa ho dezenvolve norma polítika ba direitus humanus, anti-korupsaun no enviromentu demokrasia, no mos maneira ba prevensaun konflitu, resolusaun konflitu ( conflict resolution ), no hari’i paz ( peace building).

Timor-Leste iha interese atu adere ba ASEAN desde iha tempu luta ba independensia, nune’e depois hetan independensia 20 Maiu 2002 Governu Timor aprezenta hanoin no idea Timor atu sai membru ASEAN ba komite permanente ASEAN nian. Iha tinan 2011 Timor-Leste konsege aprezenta pedidu ofisial atu bele hola parte iha ASEAN hanesan membru legal. Agora dadaun Governu Timor-Leste mos hari’i strutura ba assuntu ASEAN nian ne’ebe mak lideran husi Sr. Roberto Sarmento de Oliviera Soares hanesan Sekretáriu Estadu ba Assuntu ASEAN.

Importansia ASEAN Political-Security Community ou Komunidade Polítika-Siguransa ASEAN Ba Timor-Leste.

ASEAN community 2015 ou Komunidade ASEAN 2015 fo opurtunidade bot liu ba seitor ekonomia, ASEAN Economic Community ou komunidade ekonomia ASEAN hetan 60%, ASEAN Political-Security Community ou komunidade polítika-siguransa ASEAN/APSC 25% no ASEAN Socio-Cultural ou komunidade sosiu-kultra ASEAN 15%. APSC nudar pilar konaba’a polítika no siguransa iha komunidade ASEAN 2015, jeralmente APSC iha pilares hat ( 4 ) atu realiza ba planu mak hanesan:

1.    Political Development/dezenvolvementu polítika;

Hala’o koperasaun dezenvolvementu polítika, forma no fahe norma.

2.    Comprehensive Security/ komprehensivu siguransa;

Iha parte ne’e sei diskute no hala’o barak liu iha parte prevensaun polítika, hari’i paz post konflitu ( post conflict peace building ) no non-tradisional siguransa ( non-traditional security).

3.    Pacific settlement of Disputes/rezolve disputa pasifiku;

Iha parte ne’e sei koalia liu ba iha resolusaun konflitu ou conflict resolution.

4.    External Relations/relasaun externa, Outward-Looking Approach/aprosimasaun vizaun ba liur, Regional and Global Architecture/ arsitektur regiaun no globalizasaun;

Sei realiza planu konaba’a sentraliasaun ASEAN (ASEAN Centrality ) no kontribuisaun husi ASEAN ba problema-problema global.

 

Hanesan nasaun ne’ebe aplika ona atu sai membru ASEAN signifika katak Timor-Leste tengki ou sei hala’o planu husi APSC ne’ebe esplika ona iha leten husi pilares hat sira ne’e. Impaktu pozitivu husi interegasaun polítika-siguransa iha ASEAN ba Timor-Leste nia dezenvolvimentu polítika-siguransa mak: 

1.                ..  Polítikamente Timor-Leste bele akumula ho nasaun sira ne’ebe iha rejiaun ne’ebe hanesan ( Indonezia, Malazia, Thailandia, Filipina, Brunei Darussalam, Singapura, Vietnam, Laos, Kambodia, Mianmar) ho nune’e bele fahe responsabilidade mantein siguransa rejiaun. Analojiamente, iha ambiente ida nia laran uma kain hotu-hotu ( nasaun membru ASEAN ) tur hamutuk hodi koalia konaba’a isu ou problema siguransa iha ambiente nia laran no iha uma kain ida iha ambiente ne’e (Timor-Leste) la partisipa iha laran. Rezultadu mak disvantajem iha informasaun konaba’a ameasa-ameasa ba siguransa iha ambiente laran, la rekonese lalaok atu rezolve problema siguransa, no politikamente nasaun ne’ebe la partisipa ne’e sei la iha amigu iha ambiente nia hela ba’a. Katak pilar husi APSC ne’ebe sei koalia konaba’a dezenvolvementu polítika/political development, primeiru; pilar ne’ebe sei koalia konaba’a oinsa hala’o koperasaun dezenvolve polítika no oinsa fahe no forma norma bele fo oportunidade maksimu mai Timor-Leste hodi asesu ba informasaun siguransa rejiaun no politikamente iha amigu hodi fahe no forma norma tuir interese nasional no segundu; importante mos mak sei prevene konflitu iha futuru liu-liu konflitu rai iha fronteira no siguransa fronteira, ne’ebe agora dadaun komesa mosu ba publiku ituan ona entre Timor-Leste ho Indonezia ne’ebe sai membru ASEAN mos. Tamba ho adezaun Timor-Leste ba ASEAN otomatíkamente tengki iha no hala’o norma siguransa ida deit ho Indonezia no iha Blueprint APSC hateten katak APSC hanesan entidade ne’ebe sei mantein stabilidade iha rejiaun ho koperasaun polítika no siguransa hanesan planu primeiru. Terseiru; adeazaun Timor-Leste ba ASEAN fo mos balansu forsa Timor-Leste iha palku polítika internasional, ezemplu Timor-Leste iha votus maximu kuandu hala’o Asembleia Siguransa Zeral ONU nian no iha balansu forsa bainhira mosu konflitu ho nasaun seluk iha futuru.

  II.   Ameasa siguransa iha Timor-Leste barak liu mai husi laran, hanesan krime organizadu, dezempregu, mal nutrisaun, konflitu sosial, no seluk tan. Pilares dala ruak APSC ne’ebe sei realiza konaba’a hari’i paz post konflitu ( post conflict peace building ), sei fo vantazem ba Timor-Leste tamba kuaze nasaun ASEAN iha susesu iha hari’i paz post konflitu ( post conflict peace building ) famozu liu mak Indonezia ( kazu ACEH ) ne’e duni nasaun ASEAN sira ne’e iha esperiensia hodi bele fahe ba Timor-Leste ( transferensia esperiensia husi Nasaun ASEAN konaba’a hari’i paz post konflitu/post conflict peace building). Nasaun ne’ebe seidauk maduru Timor-Leste infrenta ona problema non-traditional security, hanesan kazu droga ne’ebe tama ho hodi tranzitu iha Timor-Leste ho destiniasaun ba Indonezia sita iha jornal tuir opiniaun privadu nia mak vantajem hodi rezolve no prevene problema droga ne’e tamba APSC nia pilar ida koalia konaba’a Comprehensive Security/ komprehensivu siguransa, ne’ebe’e sei diskute no hala’o barak liu iha parte prevensaun polítika, hari’i paz post konflitu ( post conflict peace building ) no non-tradisional siguransa ( non-traditional security). Droga inklui iha non-tradisional siguransa ne’ebe sei foka mos iha APSC, ne’e sei fo vantazem ba Timor-Leste.

   III.     Programa ARF no Hasae kapasidade iha lisaun no esperiensia Timor-Leste iha seitor siguransa no suporta polítika Governu Timor-Leste liu husi SED ( Sekretariu estadu Defesa) ne’ebe atu moderniza F-FDTL, ho programa hanesan ARF ne’e bele fo refrensia oinsa dezenvolve forsa F-FDTL tuir isu siguransa ne’ebe’e resente. Tamba ARF ne’e hanesan forum ne’ebe’e konstrutivu dialogu no konsultasaun konaba’a interese no atensaun hamutuk iha polítika no siguransa problema ou isu no mos atu halo signifikantu kontribuisaun ba esforsu atu hari’i fiar a’an no preventivu diplomasia iha rejiaun Azia Pasifiku. Forum hanesan ARF ne’e presija tebes ba nasaun hotu tamba agora dadaun perspektiva siguransa laos siguransa ne’ebe koalia konaba’a konflitu entre nasaun ida ho nasaun ida maibe siguransa agora dadaun ne’e fo atensaun mos ba siguransa povu ho nune presija tulun husi nasaun seluk hodi rezolve tamba nasaun idak-idak iha esperiensia no lisaun oinseluk ho nasaun seluk. 

 

Impaktu negativu Interegasaun ba ASEAN ba Timor-Leste?

Posibilidade hetan intervensaun ba problema siguransa no defeza Timor-Leste nian husi nasaun membru ASEAN seluk ne’ebe karik bele kompleksu liu tan tamba intervensaun ne’e dalaruma entre pozisaun netral no iha interese husi nasaun ASEAN sira ne’e. Ezemplu barak mak hatudu ona iha palku polítika internasional katak intervensaun nasaun ida  ba polítika, siguransa, ekonomia no seluk tan ba nasaun seluk ikus mai dalaruma fo impaktu negativu ba relasaun nasaun rua. Sistema siguransa Timor-Leste ne’ebe sei fraku otomatika fasil mai nasaun membru ASEAN sira atu halo intervensaun iha area siguransa Timor-Leste nia karik liu husi ajuda ou koperasaun sira.

Profil Timor-Leste bele a’at sekuandu partisipaun Timor-Leste iha programa-programa ASEAN la aktivu no maksimu. Tuir informasaun ne’ebe iha, summit meeting ASEAN liu husi 1000 iha tinan ida nia laran ne’e duni bele fo impaktu ituan ba finansial Timor-Leste. La to’o iha ne’e deit menus infrastrutura publiku, transporte publiku no siguransa sai hanesan obstaklu ba Timor-Leste atu sai hanesan uma na’ain ba seremonia-seremonia ASEAN ne’ebe tengki hala’o iha nasaun membru ASEAN sira.

 

1 

 "Hakerek iha tinan 2013 no upload iha 14 Setembru 2014."

Mariani VK.