 |
| Fotografia hasai husi Hakerek Nain Mariani VK. |
Hakerek Nain sira nudar belun iha servisu fatin ho inisiativa ida hakarak selebra Natal tinan ida ne'e ho halo obra. Mai le'e ba hakerek nain sira nia lian liu husi hakerek karta ida ne’ebe sei fo sintimentu, imizinasaun no hanoin seluk konaba'a Natal. Liu-liu iha parte Natal nia selebrasaun.
KSOLOK NATAL 2015
Bodik ba;
Pai Natal
O nia
prezensa la realidade, maibe ema barak hein. Pai Natal, to’o minutu ida ne’e
prezenti hira ona maka konsege O halo ona? Hau la konese O husi Hau nia
inan-aman. Hau konese O liu husi filme konaba’a O bainhira sai iha televizaun, komesa
husi ne’e Hau hamosu husu oin-oin ba Hau nia inan-aman konaba’a O nia prezensa.
Hatan ne’ebe Hau hetan halo Hau nia imazinasaun furak konaba’a O para kedan,
sira dehan O la realidade, O hanesan lenda deit. Hau tristi los iha momentu
ne’eba.
Pai Natal,
se O maka realidade duni maka Hau ho labarik lubuk iha Mundu sei hakerek karta
ba O tinan-tinan. Serteza O sei ulun moras mas, O sei la ulun moruk atu haruka
prezenti sira ne’e mai ami, Hau fiar ida ne’e. hahhahahaaa… Hau imazina hela
oinsa labarik husi Timor-Leste husu ai-manu lin hanesan nia prezensa no O
atrapalha los ho ai-manu lin nia forma ne’e oinsa no O la bele buka tuir
ai-manu lin nia forma iha Google mos hahhaha, komik los.
Karik
labarik oan Timor balun deit maka hakerek ba O. Tamba karik balun deit maka
hatene konaba’a O, karik balun sinti sira la merese atu husu ba O, ou kultura
husu prezenti iha tempu Natal la ezisti iha sira nia kultura. Sira ne’e maka
labarik ne’ebe moris iha areia dok husi ahi naroman no istrundu estrada sidade
nian. Naton ba Labarik sira ne’e selebra Natal ho biskuit maran no mina nu’u
habilan sira fuk hodi ba rei kosok oan Jesus iha missa Natal. Sira selebra
loron Natal ho kontenti maske ho deit biskuit maran no mina nu’u.
Pai Natal,
labarik sira ne’ebe dok husi sidade ne’e iha mos esperansa. Esperansa ne’ebe
nabilan tebes, sei folin liu ba sira atu hetan oportunidade duke ai-manu lin ou
bisikleta hanesan sira nia prezenti Natal. Oportunidade sei hamosu hamnasa iha
sira nia oin no hamnasa ne’e sei hela ho sira to’o tempu sira fo konese
konaba’a O ba sira nia Oan sira.
Husi fuan,
Hau hato’o “KSOLOK NATAL BA LABARIK TIMOR SIRA NE’EBE HELA DOK HUSI SIDADE”.
-Husi, a’an
ne’ebe mehi Pai Natal realidade ida-
Bodik ba; Tempu Adventu.
O nia tempo ne’e badak maibe karun
tebes. Hau lakoi husu O nia novidades tanba hau hatene O sempre hakmatek no hakarak
mos ema hotu hakmatek no prepara an didiak iha O nia tempo hodi ba simu meninu
Jesus iha Natal. Maibe hau lae, hau tenki prepara an atu husik buat balu antes
ba simu Jesus no hau sente laran mamuk tebes iha O nia tempo tinan ida ne’e
nian.
Hau hakarak O mos bele hare, rona no
sente saida mak hau hasoru hodi O bele mosu mai hakman hau nia mukit no kortibu
hau nia fuan moras sira maske sei fitar hanesan ain kanek ne’ebe diak ona atu
nune’e hau bele sente hakmatek hodi prepara an didiak iha O nia tempo Adventu
hanesan ema sira seluk.
Hanesan babain ema hatete katak wainhira
iha problema, bele konta ba kolega seluk atu fahe susar no mukit
sira.........maibe hau hakarak liu atu fo hatene hau nia sentimentu ne’e ba O. “Hau halao O nia tempo ho kontente no esperansa ne’ebe nakonu maibe iha klaran hau tenki
selu ho “Vida, Lakon Atensaun, Lakon Konfiansa , Lakon Korajen no moras”. Ida
ne’e mak O nia Tempu Adventu ne’ebe hau selu karun tebes. Tanba sa hau
temi vida??? Triste tebes wainhira
hanoin hikas lakon hau nia bebe fulan lima iha hau nia kabun laran hanesan ran
fukan ida ne’ebe mak monu derepente deit husi hau nia isin. Hau temi lakon
atensaun tamba wainhira hau iha triste nia laran laiha familia ida mak besik hodi
ajuda hau. Hau mos lakon konfiansa husi hau nia lideransa rasik, lahatene
razaun saida los? Hau lakon korajen wainhira hau sente moras tebes ba hau nia
isin tomak no laiha ema enkoraja hau. Hau hatene ida ne’e planu Maromak nian no
O mos sai sasin iha momentu ne’eba. Hau mos hakarak konta buat diak barak mak
mosu wainhira hau iha sofrementu nia laran. Maske hau lakon ona vida ema ida
maibe hau sei iha Laen no oan ne’ebe mak sempre hamaluk hau iha tempu ne’ebe
deit. Hau lakon atensaun husi familia maibe hau sei iha vijinhu ne’ebe mak
hanoin no ajuda hau hanesan mos familia halo mai hau. Hau lakon konfiansa husi
lideransa ida maibe sei iha lidensa barak mak tau konfiansa mai hau no hau
kontenten tebes tanba iha kolega barak mak sempre fo koranjen no suporta
nafatin hau atu hamrik nafatin.
O nia tempo mai hau hanesan fitun ki’ik barak
ne’ebe mosu iha kalan nakukun no leno mundu ho nia nabilan no hein to’o loro
matan dader nakfera hodi halakon nia nakukun. Hau nia esperanca bo’ot atu lao
ba tinan foun ho esperiensia barak inklui esperiensia bo’ot ne’ebe hau hetan
durante O nia tempo, Karun tebes maibe fo kualidade moris mai hau. O nia tempo
ida ne’e sei sai istoria furak ida iha hau nia dalan moris atu hau bele
respeita teb – tebes moris ne’e rasik.
Ikus liu, hau hakarak hato’o agradese ba
O tanba O prontu rona ona hau nia istoria triste ne’e. Hau hein katak O nia
tempo oin mai sei sai furak liu tan mai hau atu hau bele konta O nia tempo ho
oin midar no hamnasa kona ba novidades foun.
Boas Festa Ksolok Natal 2015 no
Feliz Tinan Foun 2016
Kumprimentus
Elisabeth dos Reis
Bodik ba; Kosok Oan jesus
Hau nia
gostu halakon O nia sentido. Ollá...belun diak, saudades tebes ho O nia
presenja nebe lori hakmatek no dame mai hau. O mak belun nebe sempre fo hanoin
hau oinsa atu moris, moris iha kiak, mukit no iha simplescidade nia laran.
Maski kiak no simples tebes maibe iha O hau hetan naroman, dame no ksolok nebe
fo mahan mai hau no hakmatek ne’e hau sei la hetan iha fatin seluk. Ho O hau
senti hau riku. O nia prezensa maski folin laek iha tempu neba, maibe oras ne’e
mundo tomak bele hare no senti O nia presenja no hau nebe moris iha gerasaun
ne’e sei lembra nafatin O iha hau nia lalaok
moris. São Francisco de Asis iha tinan 1223 selebra fila fali O nia presenja
iha rai Greccio, Italia, iha neba primeira vez São Francisco hanoin no hamosu
fali situasaun uluk O mai iha mundo ne’e. Agora gerasaun ne’e sei tuir nafatin
São Francisco nia ain fatin, nebe liu husi aksaun ida ne’e, oinsa ami bele hatudu
no ekspresa sai ami nia domin no ami nia esperança ho O nia presenja. Loron
nebe O moris mai, ami selebra no hanaran “Natal” (mai husi lian Latin, Natus katak nascimento), iha loron 25
Desembru ami selebra O nia loron moris.
Simplecidade
katak la halo liu, ne’e mak O hatudu iha tempu neba hodi mai moris iha bibi
luhan ida, maibe ami gerasaun agora hatudu buat nebe kontrariu ho saida mak O
husik hela mai ami. Ami prepara O moris fatin (bibi luhan) infeita ho buat
oin-oin, buat nebe karik iha O nia tempu laiha. Gerasaun hotu hatene katak iha
O nia tempu, bibi luhan nebe O moris ba nakonu ho animal, duut maran no hetan
naroman husi fitun iha lalehan. Agora Fitun nebe naroman iha lalehan ami troka
ho ahi oan nebe lakan nabilan ho kores oin-oin. Hananu ksolok husi Anjo sira ami
troka ho musika furak ami nian no ami tau koluna boot iha fatin ne’e. Liurai no
bibi atan sira ba tuku tur hanai no agredece ami troka fali ho baruliu no hemu
tua iha laran. Hau hatene katak O la konkorda no satisfeito ho buat hirak ne’e
maibe oinsa mak bele muda hanoin no hahalok ne’e? Hau iha mehi ida no sempre
iha esperança boot katak buat sira ne’e neneik sei muda no sei tuir O nia
hakarak.
Husi: Hau nebe hein nafatin.
Germina Vong
Tidak ada komentar:
Posting Komentar