 |
| Livru ki'ik ne'ebe iha nia laran bele hetan artigu hakerek karta no hakerek kreativu seluk tan |
Hakerek karta istilu hakarek ne’ebe iha nia laran
konaba’a hakarek nain no simu nain. Simu nain iha ne’e bele ema, instituisaun,
sistema, sasan ou buat ne’ebe ita hare no la hare. Kontiudu karta maka mensazem
husi hakarek nain ne’ebe hakarak komunika ba simu nain.
Bazeia ba tema zeral Festival Laloran nian, “Dili
Livre Husi Violensia Bazeia Ba Jeneru”, maka Hakarek Karta ho tema “Dili Nian
Problema Bo’ot” sei hakarek karta ou surat ba: dahuluk maka “Bodik ba La’en ne’ebé Hanoin nia Hanesan Maromak iha
Uma–Kain”, hakerek nain maka Merry Freitas. Daruak, “Bodik ba Sintina Publiku iha
Dili”,
hakerek nain maka Mariani VK. Datoluk, “Bodik ba Dili Nia Nakukun”, hakarek
nain maka Merry Freitas no dahat, “Bodik
ba: Hafolin Feto”, hakerek Nain maka El Shavana. Hakerek nain sira hetan guida ou bimbing husi Mrs. Anne CH. Ostby ( hakerek nain husi livru 9 ona no nasionalidade husi Noruega ou Norway ). Hakerek karta ne'e aprezenta ou le'e ona dala rua iha Festival Laloran ne'ebe hala'o husi ONG Ba Futuru, UN Woman Timor-Leste, Reprezentate Uniaun Europeia iha Timor-Leste. Ba dahuluk aprezenta iha Xanana Reading Room, Dili. ( 27 Novembru 2015 ) no Jardim 05 de Maio, Colmera ( 03 Dezembru 2015 ). Hakerek Karta ne'e mos produs ona iha livru ki'ik ida husi parte Festival Laloran.
Mai le'e ba hakerek nain sira nia lian liu husi hakerek karta ida ne’ebe sei fo
hakfodak ba ita bo’ot sira.
 |
| Photo ne'e foti husi internet |
Bodik ba la’en ne’ebé hanoin
nia hanesan Maromak iha uma–kain,
Ha’u
hadomi no elojia tebes o wainhira o hatudu o-nia domin mai ha’u iha inísiu ita
harii uma-kain no hadomi ha’u hanesan fen ida ne’ebé iha o-nia sorin.
Maibé kuandu tempu la’o o komesa halo
o-nia an hanesan Maromak ne’ebé hakarak ukun loos ha’u no halo ha’u lakon fiar
no lakon domin ba o. Tanba saida mak ha’u dehan hanesan ne’e? O hakarak hatene?
Tanba o halo o-nia an liu fali Maromak hodi ukun ha’u hanesan o-nia kriatura.
Uluk,
wainhira ita hahú moris hamutuk, ha’u lembra katak karik ita-nia felisidade
ne’e la’o to’o rohan maibé to’o iha dalan klaran o komesa ukun ha’u tuir saida
mak o hakarak. Ha’u sente presaun komesa mai hanehan ha’u no ha’u forsa la’ek
atu hasoru. Buat ida ne’ebé o presiza atu hatene katak ha’u ema kriatura ne’ebé
hakarak moris hanesan fen sira seluk ne’ebé nia laen hadomi.
Maibé
tansá hahalok ida ne’e mosu enkuatu uluk ita hadomi malu? Ha’u karik lavale ona
iha o-nia matan ne’e mak o hakarak halo ha’u tuir o-nia ukun no hakarak.
Ita
karik labele ona atu moris kontente tan de’it o-nia hahalok ne’ebé halo ha’u
monu tiha ba rai no susar atu hamriik fali. O hatene no ema hotu hatene ha’u
mak o-nia fen maibé dalaruma o halo ha’u helik deit iha o-nia sorin. Ha’u
labele atu hamriik hanesan ho o. O lasimu ha’u hanesan o-nia kaben maibé haree
ha’u hanesan atan ida iha o-nia uma.
Ha’u
laran susar no hanoin katak ha’u ne’e fen ida maibé tansá ha’u la sai hanesan
fen sira seluk.Ha’u hakarak hakilar maka’as atu ha’u bele livre husi presaun
sira ne’e. Ha’u lakohi atu sai fali atan ba ha’u-nia domin ne’e. Husik ha’u
moris hanesan ho fen sira seluk ba tanba ha’u, o-nia fen. Ha’u la’ós ema seluk
ne’ebé iha o-nia sorin maibé ha’u feto ida ne’ebé moris hodi kompleta o-nia
moris ne’e. Maibé saida mak ha’u hetan wainhira iha o-nia sorin, ha’u sai ema
ne’ebé laran-taridu tanba hahalok sira ne’ebé ha’u hetan ne’e halo ha’u kanek
no todan. Ha’u moris laiha ona valór iha o sorin.
Halo
ha’u sai ema ida ne’ebé prienxe o-nia moris ho ha’u-nia prezensa tanba ha’u sai tiha ona o-nia fen no ha’u hakarak
ita bele hamnasa hamutuk no labele halo hahalok ne’ebé halo ita-nia uma-kain
naksobu no ema hotu hatene hodi ko’alia ba malu. Buka hadomi malu ba no ita
bele hadi’a hahalok sira ne’e.
“Husi lian laek ne’ebé moris iha dilema nia
laran”
Bodik ba Sintina Publiku iha Dili,
O nia
nonok maka sasin ba feto nia susar no terus. Sintina Publiku, ba dahuluk Hau
lakoi husu O nia novidades tamba karik O sei interese liu koalia konaba
akontesementu oinsa feto sira hetan violensia seksual, oinsa feto sira hetan
hafu’u husi mane maluk sira no oinsa feto sira tauk tebes atu uza O tamba deit
akotesementu sira ne’e.
Hau
hakarak husu ba Pai Natal atu bele mos halo O
sai radio hanesan Hau nia prezenti Natal nian. Karik ho nune’e O laos deit
sintina publiku iha Dili ne’ebe nonok, maibe bele mos dedika buat ne’ebe O
sasin ona, ba se deit maka bele hadia O nia savi sira at ne’e, kuak sira iha O
nia lolon ne’e no fo siguransa ba se deit maka presija O iha momentu ne’ebe
deit.
Knanuk
famozu ida dehan “Rai Dili, rai sidade se mak la hatene...” maibe Hau iha
hanoin seluk, karik O nia prezensa ho
furak no seguru mos bele suporta Dili sai sidade. Dili nia tasi
azul, rai henek mutin, foho, ai-kasi funan, anin fresku halo ema barak hakarak
halo aktividade iha liur maibe bainhira sira presija O, liu-liu feto sira, tuir
O nia hanoin karik ida ne’e bele sai razaun sira bele hirus? Sira haluha tia
Dili nia furak sira ne’e? Sira sinti la seguru? Sira sinti tauk? Perguntas
importante seluk maka karik atu halo Dili sidade depende mos sintina publiku
nia kondisaun diak no siguru? Aaiiihhhh... Hau haluha O la bele hatan perguntas
sira ne’e maske O hakarak, tamba O so nonok deit, ba se perguntas sira ne’e bele hetan nia hatan?
O laos
mehi a’at maibe O bele sai mehi a’at ba feto sira iha Dili ho O nia kondisaun. Furak
kuandu O bele
sai hanesan doben romantiku no sempre fo hakuak hodi oferese sintimentu morna
ba feto sira ne’ebe ema dehan kriatura fraku bainhira sira presija O. Sira sei
haksolok no hadomi O fila ho sira nia
laran tomak, O sei sai sira nia istoria furak no sei sai sira nia mehi diak,
maibe ne’e mehi dok ida.
Ikus
liu, Hau hanoin Hau
lakoi husu ba pai Natal atu bele mos halo O hanesan radio, maibe sintina
publiku ne’ebe bele mos sai doben. Karik ho nune’e O nia prezensa laos deit
sasin ne’ebe nonok deit maibe sasin ne’ebe fo domin no sintimentu seguru, tamba
sintimentu mos naton ona. La bele husu liu tan,
O atu sai sintinia publiku ne’ebe furak, tamba ema sira responsabilidade atu
halo O furak la iha mehi ba ida ne’e. Sira
atrapalha ho buat ne’ebe karik la importante ba Dili.
-Husi feto ne’ebe mehi sintina pubiliku ne’ebe furak
no siguru-
Bodik Ba Dili Nia Nakukun,
Hai.. Nakukun o di’ak ka la’e ? Ita sempre hasoru malu
iha kalan-kalan, maibé tanba sá mak ema hotu tauk o. Kuandu o komesa mosu mai
ema hotu hakarak atu fila bá uma. Tansá o sempre mai hatauk ema?
Ha’u hakarak hatete de’it ba o katak halo oinsá mak
ema hotu bele fiar o atu nune’e sira labele tauk o wainhira sira hakarak la’o
iha Dili laran. O hanesan anju metan ida mai hafalun sira nia la’o ne’e. Karik
ema hotu sente katak o lafó seguru ba sira iha nakukun laran, maibé sira
hakarak o fó seguransa ba sira atu nune’e sira bele la’o ho livre.
Buat ida tan mak ne’e, liuliu feto sira, tauk loos
kuandu sira hasoru O. Ha’u lahatene, ita iha seguransa maibé ida ne’e nafatin
la garante atu feto sira la’o konfortavel hamutuk ho O.
Iha O ne’e buat barak mak iha laran. Lahatene sé mak
iha laran hodi hatauk ema. Maibé hakarak husu ba o katak bele ka la’e ita sai
belun di’ak hodi akompaña Hau waihira la’o no o mak sai Hau nia guarda atu
nune’e Hau labele tauk O.
Ha’u karik demais liu atu husu, tansá mak ema hotu
tauk fali O? O bele hatán ida ne’e mai ha’u ka la’e? Tanba sá mak ida ne’e sai
problema ba ema hotu tan de’it o-nia nakukun ne’e!
Depois kuandu o-nia nakukun mosu mai ema sempre hanoin
violénsia oioin iha ema nia kakutak kuandu la’o iha o-nia nakukun. Saida mak
ema hanoin ba o ne’e loos ka la’e?
Belun Nakukun, ha’u hakarak ita sai onestu ba malu,
maski la’o kalan ka loron, labele loron de’it ema brani atu la’o maibé kalan
mós. Kalan-kalan ita hasoru malu, ita labele tauk malu atu ema ida labele sai
vítima.
Espera ita sai belun di’ak liu, agora, aban no loron-loron…laiha
nakukun hodi hatauk malu.
“Husi ema ida ne’ebé hakarak o hamaluk”
Bodik Ba : Hafolin Feto,
Ho respeita Hau
hakarak koalia ituan sobre o “ hafolin feto”. O mak sistema ida ne’ebe ema uza
husi bei-ala to’o agora no jerasaun ba jerasaun. Maibe Hau triste wainhira iha
uma kain ida wainhira mosu problema sempre temi konaba O. O mai iha mundu ne’e
sai hanesan problema ou mai sai hanesan simbolu familia rua atu kunyese malu?
Hau triste wainhira mosu prolema ida ne’ebe ema sempre
dehan problema violensia domestika iha uma laran entre fen ho laen, tantu feto
ou mane idak-idak ho nia rasaun katak husi O. Akontese maka ne’e, se mane sidauk hafolin feto no mane ne’e basa, tuku,
tebe feto ne’e diretamente feto ne’e sei dehan ba mane ne’e “O sidauk fo folin
Hau O baku tena Hau, mane moe laiha!”. Akontese seluk, mane ida fo folin kotu
ba feto ida no wainhira nia halo violensia ba feto ne’e sempre dehan “Hau baku nian karau no osan ne’ebe mak Hu fo
ona hanesan O nia folin”.
Hau hakarak ema hotu komprende, O laos atu utiliza
sala no O laos atu sai hanesan sasukat ida ne’ebe ema atu kompara O ho halimar.
O mak hanesan kultura ne’ebe beiala sira kuda mai ami. Hau hakarak ema hotu
komprende O iha ita nia moris, maibe mundu agora oin seluk ho sira nia hahalok
ne’ebe mak mosu diferensia ne’ebe barak.
Wainhira maka Dili atu bele sai seguru? Loron kah
kalan problema fen ho laen dala barak
laiha buat seluk, maibe sempre temi konaba O. Husu ba O atu lalika mosu
sai hanesan kauza konflitu entre fen ho laen iha futuru, atu nune ita nia Dili
sai Sidade ne’ebe mak laiha violensia
domestika kauza husi O no Dili sai ezemplu diak ba sidade seluk. Se maka atu
responsabiliza O no halo edukasaun ba ema sira iha Sidade Dili hodi minimiza
konflitu iha Sidade Dili tamba kauza husi O?
Dili, 11-10-2015
Husi Dili Nia Mane
EL Shavana
Tidak ada komentar:
Posting Komentar