JAPAUN IHA AI-SAKURA FUNAN, TIMOR-LESTE IHA AI-KASI FUNAN

Fotografia ai-kasi funan ne'e kolesaun privadu Hakerek Nain no fotografia sakura funan husi internet, espera hakerek nain bele iha koleksaun privadu sakura funan iha tempu badak :)

Artigu oin-oin esplika, famozu ona iha Mundu katak ai-sakura husi Japaun no sai ona simbolu husi Nasaun Japaun. Ema barak maka soe ona tempu no osan hodi vizita Japaun hodi ba hare deit funan husi ai-sakura no mosu festival ai-funan sakura ho naran O-Hanami. Espesial husi ai-sakura maka nia funan ne’ebe nakonu iha nia lolon, la iha ai-tahan ida mos bainhira tempu ai-sakura funan.

Reportazem media no artigu husi peskiza hatete ona katak husi ai-funan sakura inspira ona artesenatu sira kria sira nia obra no ikus mai fo lukru bo’ot tebes iha area ekonomia kreativu Japaun nian no tutan mos ba dezenvolvimentu pozitivu kultura, sosial no politika ( ai-funan sakura sai simbolu diplomasia Japaun nian no seluk tan ) Nasaun Japaun. Oinsa ho ai-kasi funan iha Timor-Leste?

Interesante tebes koalia konaba’a ai-kasi funan Timor nian ho hanoin ida bele halo hanesan sakura funan iha Japaun. Husi istoria verbal ou ibun ba ibun, katak Sidade Dili iha tempu Portugues nia kolonialismu identiku ho Sidade Ai-Kasi Funan. Sidade Dili ne’ebe ki’ik iha momentu ne’eba infeita ho ai-kasi funan nia kor. Iha fotografia Sidade Dili barak iha uluk tempu kolonialismu Portugues maka hatudu ai-kasi funan ne’ebe moris buras iha Estrada ninin. Ida ne’e fo hatene mai ita katak Sidade Dili momentu ne’eba iha interese tebes ba ai-kasi funan. Tamba ai-kasi funan hafurak Dili no istoria ibun ba ibun mos barak dehan, Dili famozu tebes ho nia ai-kasi funan entre teritoriu kolonialismu Portugues nian. 

Fotografia Sidade Dili iha tempu kolonialismu Portugues: Ai-kasi funan iha kurzamentu Farol. Fotografia ne'e Hakerek Nain hetan husi Mana Este Amaral DF.

Fotografia Sidade Dili iha tempu kolonialismu Portugues:Ai-kasi funan iha area Palacio Governo. Fotografia ne'e Hakerek Nain hetan husi Mana Este Amaral DF.

 

Fotografia Sidade Dili iha tempu Timor ukun a'an, fotografia ne'e hasai iha semana primeiru fulan Dezembru 2015: Ai-kasi funan iha estrada bot Pantai Kelapa ou Praia dos Coceirros. Fotografia ne'e kolesaun privadu Hakerek Nain.

Tuir observasaun Hakerek nain, agora dadaun ne’e, ai-kasi funan iha Timor-Leste iha kor mean, kor de laranja ou orange no kreme kahur kor de laranja ou orange. Iha tempu okupasaun Indonezia mai Timor-Leste iha knanuk famozu tebes ne’ebe iha nia lirik temi ai-kasi, “Ai-kasi Funan Buras Halo Dili Matak, Dili Rai Sidade Se Mak La Hatene”. Dili oan sira sinti orgulhu tebes wainhira rona ou hananu knanuk ne’e, maibe ironia tebes iha Timor-Leste sai nasaun soberanu ida ai-kasi hanesan la folin, la tau iha planu nai ulun sira nian, la iha Dili oan ida maka interese atu inisia movimentu haburas ai-kasi, no la iha intelektual Timor Oan maka inisiativa hodi halo estudu ou peskiza konaba’a ai-kasi. Buat sira ne’e importante ou lae ba Timor-Leste?

Importante. Importante tebes atu tau iha agenda dezenvolvimentu ai-kasi funan. Maibe se nia agenda? Nia hatan maka entidades tomak iha Timor-Leste nia agenda. Tau iha Governu Timor-Leste nia agenda ho objetivu bele dezenvolve rekursu naturais ne’ebe iha hodi aumenta rendimentu nasaun nian. Tuir mai, tau iha agenda intelektual Oan Timor sira atu nune’e bele kria peskiza hodi identifika uniku husi ai-kasi funan, ezemplu: identifika ai-kasi funan, tipu ai-kasi funan hanesan iha Japaun sira susesu identifika tipu funan sakura nian hanesan  Yaezakura, Oshimazakura, Shidarezakura, Someiyoshino no iha liu husi 200 tipu tan. Ikus liu, tuir hakerek nain tengki tau iha komunidade Timor-Leste nia agenda. Ida ne’e importante tebes tamba bele lori inspirasaun no dudu Governu no parte intelektual Timor-Leste atu servisu makas liu tan hodi dezenvolve ai-kasi funan tamba komunidade ou povu ou individu maka sai pilar ba desijaun politika nasaun nian. Buat sira ne’e hotu sei fo lukru ba Timor-Leste no Oan Timor sira duni.

Perguntas bot ida mosu, tamba saida maka ai-kasi bele fo lukru ba Timor-Leste? Nia hatan simples tebes, tamba ai-kasi ne’e: iha Tetun dehan furak, iha Ingles dehan beautiful, iha Portugues dehan bonita no lian Indonezia dehan cantik. Hanesan ho sakura funan furak ou bonita, maka sai razaun ba ema husi laran no liur Japaun atu mai hare no inspira ona artesenatu sira nia obra. Bainhira ema husi liur atu mai hare sakura funan iha Japaun sira gasta osan selu transporte, visa, akomodasaun, hahan, hemu no karik sasan husi artesenatu sira ne’ebe inspira husi sakura funan. Ida ne’e fo ona rendimentu ba Japaun. Ida ne’e mos bele akontese mai Timor-Leste kuandu komesa tau ai-kasi funan iha agenda no komesa dezenvolve, realidade hatudu katak ai-kasi funan no sakura funan ne’e bonita. Antaun ne’e katak ai-funan kasi no sakura ne’e iha similiaridade.

Artigu ida ne’e hanesan idea husi hakerek nain depois sinti admira ho ai-kasi funan nia furak bainhira halo movimentu ho ninian motor iha estrada Dili laran iha fulan Novembru to’o Janeiru tinan-tinan.

Dili, 19 Dezembru 2015

Mariani VK.