Projeitu: "Ha'u Nian Tatoli" I (dahuluk)

Kantil

Ha’u nian kantil, maka ha’u nian belun diak.

Tinan barak liu ba, ha’u nian inan fo mai ha’u kantil ho kór kinur hanesan prezenti iha loron dahuluk ha’u hakat ba eskola. Komesa momentu ne’eba ami nain-rua kantil kór kinur ne’e sempre hamutuk. Hamutuk bainhira ha’u ba iha tasi, iha igreja, merkadu no dala-barak mos ami hamutuk iha ha’u nian mehi husi toba. 

Molok ha’u atu husik rai doben Timor-Leste hodi kontinua estudu, ha’u nian amiga diak ida fo mai ha’u kantil ho kór azul hanesan prezenti. Ha’u haksolok tebes. Kantil azul ne’e sempre hamutuk ho ha’u iha fatin ne’ebé deit no klima saida deit iha rai ne’ebé dook husi ha’u rai “ran fakar fatin”. 

Agora dadaun, ha’u iha kantil tolu. Kantil sira ne’e ho kór oin-oin deit. Kór mean, kór azul no ida seluk kór de roza. Kantil sira ne’e maka hamaluk ha’u. Ksolok ne’e maka wainhira hetan hamaluk.

Osaka, Japaun. 29/04/2017

Mariani VK.

Istoria Badak; Iha istoria husi kompania Osaka Gás ba Abui no Anoi

Dezenu ou ilustrasaun ne'e foti husi Google.

Udan tun iha fulan fevereiru ne’e aumenta malirin tan Japaun nian tempu rai-malirin. Liman iha sumbrina ne’ebé sata netik udan been, Abui nian ain hakat lais iha udan been ne’ebé nalihun iha estrada sidade Osaka, Japaun. Tu-tuir dalan Abui nian hanoin nakonu ho shá manas, na’an-manu sona ho etu, Abui malirin no hamlaha. Ikus mai, Abui ho kabun bosu, tur iha kadeira roda ho koor mutin, no nia liman kaer shá iha xikra ho koor malahuk tuur hateke husi janela ho kurtina mutin hanesan sorvete mutin, ba udan nian turuk. Teki-teki, Abui nian telefone lian, nia hamnasa mihis antes simu telefone ne’e, no konversa mos akontese:

Abui: “halooooo Anoi doben…..lokraik atu ba rai-nakaras diak hahaha” hakilar Abui hodi simu telefone husi nian amiga diak tebes Anoi, ne’ebé agora dadauk hela iha Dili. 

Anoi: “hahahehehhee… O mos komik, nusa diak lae iha Japaun ne’eba? Keta han ikan matak demais ehhh hahhahaha”.

Abui: “Ikan sira doben la iha sira ne’e matak mos ha’u han deit. Ikan sira, iha doben ona ne’e tein tia maka ha’u han hahahahha.. Ha’u diak, maibe rai-malirin los. Halo ha’u hakarak hela deit iha uma laran ho AC manas”.

Anoi: “hahhahaha ne’e maka ikan sira ne’e la-lika gostu demais hahhaa… Kuitadu, ne’e kala O selu eletresidade makas maka ne’e? Hatais jaket halo mahar too..”.

Abui: “Folin gás maka sae los iha tenpu rai-malirin ne’e. Anoi, hatene kah lae? Kompania Osaka Gás ne’ebé ha’u uza agora dadaun ne’e, halo mos produsaun 10% gás nian iha zona ekonomia Tasi Timor. Ne’e ita Timor oan nian gás”.  Abui esplika ho seriu ba nian kolega Anoi ne’ebé halakon ninian lian hodi rona Abui, ho nune’e Anoi hatan..

Anoi: “oohh.. nune’e kah.. antaun komik fali, Governu Japaun fo osan ba O liu husi bolsu estudu, depois lori osan ne’e O sosa gás husi O nian nasaun, hodi uza iha Japaun hahahhahaha”.  Anoi koalia ho ritmu ne’ebé admira.

Abui: “aaiiihhh.. los duni, hahahaa mundu ne’e buat bulak maka hakonu. Antaun, ha’u fase bikan lai depois ita kontinua dada-lia konaba mundu nian bulak. Adeus.”

Anoi: “Adeus Miss Abui”.

Hakerek Nain: Mariani VK.